Útskrift!

Í dag er útskriftardagurinn minn og ég get frá og með seinnipartinum í dag, notað titilinn stjórnmálafræðingur. Það er nú víst betra að maður viti þá eitthvað í sinni haus. Eins og maður er búin að bíða eftir þessu mómenti lengi, þá er þetta hálf óraunverulegt. Ég var alveg búin að sætta mig við það að mæta ekki í útskriftina og það var ekki fyrr en í gærkvöldi að mér fannst allt í einu hálf leiðinlegt að geta ekki veitt skírteininu mínu viðtöku. En hvað um það, ég gerði vel við mig í gær og keypti mér þetta fína fóðraða vesti og TVÖ glansmagasín og ég ætla bara að lesa um the best beauty products og high street fashion um helgina. Svo maður sökkvi sér ekki bara í lágmenninguna þá ætlum við í dag í Dynamic Earth sem er svona náttúrusafn. Og fara svo eitthvað gott út að borða því við erum líka að fagna sextugsafmælinu hennar mömmu sem er næsta laugardag. En allavega, svona tímamótum vill maður fagna með vinum og velunnurum og þess vegna langar mig að verða dálítið sentimental og halda hér stutta tölu ykkur til heiðurs:

Í fyrsta lagi á mamma mín alveg svaka mikið í öllu því sem ég hef afrekað því hún er mitt sanna back up og hefur verið mér ómetanleg aðstoð í öllum skilningi. Auk þess eyðilagði hún tvo prentara vegna hins óraunverulega magns af glósum sem hún prentaði út á þessu þriggja ára tímabili og las yfir allar ritgerðirnar mínar sér sjálfri til mismikillar ánægju.

Keli minn fær ótal prik fyrir að vera enn kærastinn minn þrátt fyrir að hafa m.a. þolað kvöldupplestur úr Neill Nugent um stofnanir Evrópusambandsins, sem hann gerði án þess að kvarta. Hann fékk einnig að prenta út nokkuð magn af glósum og leiðrétta ritgerðir. Hann er núna sérlegur ráðgjafi minn í framsetningu á enskum fræðitexta.

Danni og Gísli elska mömmu sína enn þrátt fyrir að miklum tíma og púðri hafi verið eytt í námið sem annars hefði verið varið með þeim. Ballið er ekki búið hjá þeim, elsku körlunum mínum, en vonandi gerir þetta nú okkur öllum gott, in the end.

Pabbi og bræður mínir, Arnar og Árni fá bestu þakkir fyrir alla aðstoðina. Pabbi hljóp oftar en ekki undir bagga með drengina þegar á þurfti að halda og það gerði Árni minn líka auk þess að skemmta mér með nærveru sinni í skólanum. Arnar minn hefur ótrúlegt langlundargeð og hefur verið boðinn og búinn til að aðstoða systur sína, ekki síst með hina langveiku fartölvu og á heiðurinn að hönnun hinnar smart tímalínu í lokaritgerðinni minni. Magga mágkona hefur sýnt þessu kvabbi mikla þolinmæði. Bestu þakkir bæði tvö, ég skil bara ekkert í því af hverju þið svöruðu alltaf númerinu mínu á þessu tímabili.

Edda, Inga Salóme, Guðný, Elísa, Gulla, Ingunn, Lilja og aðrar vinkonur í saumaklúbbunum mínum. Takk fyrir vináttuna og öll skemmtilegheitin. Þið eruð bestar og þegar ég flyt aftur heim ætla ég að bjóða ykkur oftar í mat því nú er ég orðin svo dugleg að elda.

Síðast en ekki síst verð ég að þakka mínum kæru samnemendum í stjórnmálafræðinni er gerðu þennan tíma ógleymanlegan. Ferðirnar okkar til Brussel og Bandaríkjanna standa upp úr öðru skemmtilegu og ef mig misminnir ekki, þá er í dag akkúrat ár síðan við flugum á vit ævintýranna til Washington og New York. Ó mæ god, hvað það var gaman.
Halla, Söndrurnar báðar, Stebbi og aðrir góðir félagar; þetta hefði svo sannarlega ekki verið eins án ykkar.

Lifið heil mín kæru...
Ykkar, McHillary.