1 dagur í heimför!

Í dag tek ég á móti nýju ári í lífi mínu. Mér finnst 33 smart tala. Ég var að lesa hvað ég skrifaði í fyrra á þessum degi og þá var ég svo ánægð með mig, nýbúin að skila ritgerðunum og komin í jólafrí. Nú það sama á eiginlega við núna, ég kláraði minn hluta í verkefninu sem ég er búin að vera að vinna í síðustu mánuði á föstudaginn og við tók jólafrí!!! Mér leið pínulítið eins og ég hefði verið að klára próf, svei mér þá. Við fórum um helgina í jólapartý hjá Íslendingafélaginu og svo er maður búin að vera bara að spænast fram og tilbaka í jólastússi svo að allt sé nú reddí fyrir morgundaginn. Í gærkveldi áttum við svona semi jólakvöld höfðum þennan fína kalkún og með því hjá Arnari. Strákarnir eru í skólanum í dag og ég ætla að njóta þess sitja á sloppnum og drekka te aðeins í einrúmi. Ég er búin að opna afmælispakkann minn og fékk voða fallega styttu í afmælisgjöf frá Arnari, Möggu og Elvari Orra. Þetta er semsagt ég með guttana mína. Gat ekki verið betra.

Á afmælisdeginum í fyrra var ég líka að segja frá jólapartýinu hjá Lindsay og Barböru. Það er búið að bjóða okkur í partýið í ár en það er næsta föstudag og því miður missum við af því. Ég hefði mögulega getað losnað við smá af vömbinni svona rétt fyrir jólin með því að stíga nokkra létta þjóðdansa við Lindsay, eins og það eru nú ekkert lítið átök.

Að öðru leyti er allt með svo kyrrum kjörum hér að manni finnst næstum ekkert vera að koma jól. Ég er eiginlega stressuð yfir því að vera að missa af jólastressinu. Stressið er svo stór hluti af þessu stússi öllu, því annars finnur maður ekki léttinn þegar þetta er allt over and done with. Eða ég held ekki.

En jæja, best að vinda sér í að fara að pakka. Mig langar að fara með strákana í bíó seinnipartinn og kannski bara eitthvað huggulegt út að borða. Ég hlakka geggjað mikið til að koma heim á morgun í íslensku jólin og hitta ykkur öll.

Hilla McSmilla.