Jákvæðir straumar og stefnur...

Þá eru kosningarnar yfirstaðnar. Best að hafa sem fæst orð um þær. Ég vona að atkvæðið mitt hafi skilað sér en ég hafði nú bara fyrir því að taka strætó til konsúlsins til að kjósa og þurfti svo að koma atkvæðinu sjálf í póst. Annars finnst mér eftirleikurinn af þessu öllu svolítið kómískur. Allar að makka og halda fundi sitt á hvað. Svo er farið í mat og þá mæta einhverjir ekki aftur heldur hlaupa á fund með andstæðingunum. Þriðja partýið hleypur síðan undan merkjum og handsalar samning bara simmsalabimm, búið að finna sameiginlega stefnu á no time og ekkert raus. Maður sér þá alveg í anda senda sms hægri vinstri með samstarfstilboðum. Algjört kapphlaup um að vera fyrstur og skilvirkni í ákvarðanatöku fer langt fram úr því sem síðan sést á kjörtímabilinu. Þetta er eiginlega bara fyndið...

En jæja, hvað um það. Mig finnst orðið tímabært að segja frá þeim þremur mönnum er auðga líf mitt daglega með jákvæðum viðhorfum og augljósri starfsánægju.

Sá fyrsti er Graham, bréfberinn í hverfinu mínu. Pósturinn Páll er ekki nema bara sýnishorn af honum Graham. Þegar ég var nýflutt dinglaði hann hérna þessi elska, bauð okkur velkomin í hverfið og upplýsti okkur að önnur íslensk kona byggi með eftirnafnið –dottir í götunni. Hann sagðist hafa borið hér út póstinn í 14 ár og ef við ættum í einhverjum vandræðum með póstinn skyldum við bara láta hann vita A.S.A.P.
Um jólin vantaði mig sendingu frá Amazon áður en ég var að halda heim í jólafríið og reifaði það við Graham. Og það stóð ekki á viðbrögðunum, hann kom brunandi með pakkann á póstbílnum kl. 7.20 morguninn sem við héldum heim, með þvílíkum látum að Kela þótti bara nóg um. Hann vann sér inn fullt hús stiga strax í upphafi þegar hann spurði hvort strákarnir væru bræður mínir. Stundum segir hann mér að ég líti vel út þegar það er alls ekki rétt og ég er bara reitt og tætt á náttbuxunum og alveg grá eins og malbik. En ásetningurinn er svo sannarlega góður og það er það sem skiptir mestu máli. Hann er málkunnugur flestum í hverfinu og virðist hámarka það sem hann getur fengið úr starfinu með því að þekkja viðtakendur bréfanna persónulega. Graham er svona maður sem myndi verða valinn employee of the month eða year eða bara forever. Og af því að hér er rík tilhneiging til að veita verðlaun fyrir allt mögulegt og ómögulegt getur bara meira en vel verið að hann hafi unnið Bréfberaverðlaun nú þegar. Spyr hann að því við tækifæri.

Nr. 2 er gangbrautarvörðurinn, eða ‘the Lollipop man’við Bruntsfield Links. Hann er lítill, veðurbarinn karl sem stendur alltaf með sleikjóinn, heilsar glaðlega og segir eitthvað á Taggart skosku sem ég get með engu móti skilið. Hann tekur það mjög alvarlega að gæta öryggis barna og fullorðinna þegar hann er á vaktinni og hundskammaði mig einu sinni þegar ég fór ekki nógu varlega yfir að honum fannst. Það kemur mér einhvern veginn alltaf í gott skap að fara yfir götuna undir hans verndarvæng og það er orðinn alveg ómissandi partur af degi hverjum.

Sá þriðji er stöðumælavörður í Marchmont hverfinu sem verður oft á vegi mínum þegar ég er búin að hitta Graham og sleikjókarlinn. Það eru hreint ótrúlega margir stöðumælaverðir í þessari borg. Þessi er pínulítill náungi sem er eins og stór krakki í uniforminu. Hann syngur iðulega hástöfum og það fer ekkert á milli mála að nýtur þess alveg í botn að labba um og sekta bíla. Það er ekki annað hægt en að njóta þess með honum hvað hann er ánægður með lífið.

Af öllu fólki sem ég hef hitt á lífsleiðinni man ég ekki eftir að hafa hitt neina sem smita frá sér jafn jákvæðum straumum starfsánægju og þessir þrír gæjar. Samt vinna þeir störf sem maður hefði fyrirfram ekki talið að myndu endilega bjóða upp á það...
"Heimurinn er í hausnum á manni" sagði Rúnar Júl einu sinni í viðtali. Og það er greinilega hverju orði sannara...

Ykkar, McHilla

Ps. Afmæli á morgun á dyggur lesandi minn og fyrrum samstarfsfélagi, hún Unnur skvísa.
Margfaldar afmæliskveðjur til þín Unnur mín. Vonandi færðu gott afmælisveður og getur fengið þér white wine in the afternoon...eða jafnvel bara the best champagne in town...