Jólamarkaður...á mína ábyrgð

Þetta var nú víst jólamarkaður en ekki jólaskemmtun. Smá misskilningur. Ég ákvað nú að láta mig hafa það þó mér finndist ég hafa verið framkvæmdalaus og við fórum eftir hádegi í dag. Og það munaði ekki um dótið, drottinn minn dýri. Það bókstaflega flaut út um allt. Fjölskyldur barna í Sciennes hafa heldur betur doneitað. Ég hins vegar styrkti foreldrafélagið af örlæti með því að kaupa varning sem mitt contribution. Og the Tombola bottles voru semsagt óopnaðar flöskur sem maður átti að gefa á tombólu. Ég hélt að þeir væru að safna tómum flöskum. Það hefði nú verið upplit ef ég hefði komið með fulla poka af gömlum glerflöskum. Ég þarf greinilega að gefa mér meiri tíma í upplýsingaöflun. Og þarna voru flöskur af öllu tagi; gosflöskur, sjampóflöskur og m.a.s. vínflöskur! Skotarnir eru nú léttir á því, maður yrði alveg málaður í horn að koma með áfengi í fjáröflunarstarfsemi sem tengdist grunnskólabörnum heima á Íslandi.

Ég keypti að lokum smarties til að gefa í þetta pakkadæmi. Ég mátti engan tíma missa með skæri og límband með mér, en við komum við hjá Indverjunum upp á horni á leiðinni á markaðinn. Þetta var dálítið hraðsoðið, ég að pakka inn á sætinu á hjólinu mínu fyrir utan búðina. Þar að auki vorum við að verða of sein. Gísli var stressaður en hann átti að standa vakt á jólamarkaðnum við að selja Fair Trade Products. Við lentum í smá þrefi út af þessu mæðginin og ég endaði á því að benda honum á að mamma hans væri nú með svolítið stífa dagskrá, alveg á fullu í skólanum og með þá tvo og öllum þeim verkefnum sem því fylgdi. Gísli varð pirraður yfir þessari rökfærslu. “Það varst þú sem ákvaðst að eiga tvö börn og þú berð ábyrgð á því. Ég get ekkert að þessu gert, þetta var þinn kostur og ef þú hefðir valið öðruvísi þá væri ég ekki til.” Hananú og hafðu það kjélling.